【天堂與地獄：有人WFH，有人兩頭騰】
人類總要重複犯同樣嘅錯。
香港爆發疫情第三波，形勢非常嚴峻，好多公司都批准同事WFH。吸取過之前經驗，只要事前安排妥當，同事喺屋企溝通、夾嘢、開會都毫無難度，駕輕就熟。不過，世間上總有老屎忽高層係唔相信科技。
喺早幾個月前，疫情第二波爆發，公司IT同事一場好心，提議高層添置器材、軟件，將文件同工作數碼化。咁同事WFH嘅時候，都可以將公司營運影響減到最低。
👴高層：「因為一次疫情就買個software，唔多化算喎！」
👨🦱IT朋友：「其實回復返正常後，嗰啲器材、軟件都用得返。」
👴高層：「又要教班同事點用，學得嚟疫情都完喇！」
👨🦱IT朋友：「都唔算難學，好快學得識……」
👴高層：「我怕同事喺屋企用唔到，到時打俾你煩到你嘔呀！」
高層忽然一個轉向，伸出溫暖關懷的手，殺IT同事一個措手不及。不過做得IT，把口都唔多叻，所以講到呢度，佢已經投降認輸，然後面帶尷尬笑容返自己位繼續做嘢算。
嗰幾星期WFH，對公司完全無影響就呃你，不過後生嗰班就好啲，識走灰色地帶用「自己方法」解決遙距工作問題；不過老一輩嗰班高層就陰公，唔喺公司好似做唔到嘢咁，搞到屋企、公司兩邊走，真係睇見都覺得辛苦。
第二波疫情，幾星期後開始受控。復工第一日，老屎忽高層急不及待發表偉倫認叻。
👴高層喺位大大聲講：「好似03年沙士咁啫嘛，隔一排咩事都無喇！下次再有新疫情，都係十幾年後嘅事，到時咩軟件都Out晒，好在我哋無買！」
雖然高層無指名道姓，不過IT同事感受到背脊已插住枝箭。Fine！一日未到結局，都未知邊個先係贏家。
就喺上星期，香港疫情爆發第三波，聞說傳播力仲要勁多幾倍，公司又再度安排員工WFH。IT朋友呀，後生嗰班呀，當然無任歡迎，乖乖安心留家工作；但另一邊廂，老一輩高層嗰班，見疫情反彈嚇到面青，唔返公司又做唔到嘢。你知喇，依家出多一次街，就多一次受感染機會，喺度唯有衷心祝佢哋好運。
其實疫情由年初爆發至今，公司絕對有足夠時間新增硬件同軟件，等員工可以喺屋企順利工作。可憐之人必有可恨之處，半年時間通通錯過，總要犯重複同樣嘅錯。以為老屎忽不思進取，最多俾市場淘汰無咗份工，但又點估得到疫情之下，原來唔肯試用新科技，連命仔都有機會無埋呢？
Search